港岛区惊喜 高质西餐严选健康食材
2020-03-16

食物嘅味道同营养健康,绝对可以并存!有唔少西餐厅喺食材选择方面落足心机,即使成本可能要贵少少,仍然坚持选用各种有机食物、纯天然食材等,再精心配搭自家制酱料,食得健康之余亦可满足味蕾!

Boire et Manger (湾仔)

主打法国菜嘅Boire et Manger,环境宽敞又够光猛,以原木为主调,坐得几舒服。加上菜式份量够大,好适合一班朋友去聚餐,特别系注重健康嘅朋友,因为呢度大部分嘅食材都选用有机食物,意粉更系自家制嘅添。

藜麦牛油果沙律

大大碟嘅沙律摆碟精美,色彩缤纷,一望全部都系健康嘅蔬果同superfood(超级食物),包括牛油果、柚子、蕃茄、石榴、沙律菜等,仲有海量嘅藜麦托底。牛油果嚟自墨西哥,果肉软绵,口感creamy,连埋酸酸地嘅柚子、软身嘅水牛芝士同粒粒韧度适中嘅藜麦一齐食,口感非常丰富。


日本黑豚腰肉(350 gram)

350 gram 嘅黑豚肉绝冇欺场,外层烧至脆口,内里肉质依然软腍,仲好有肉汁。大厨更特地调配咗个自家制芒果莎莎酱配轻轻烧过嘅香梨伴碟,以其酸酸甜甜嘅味道中和返啖啖肉嘅腻感,好有心思。


烤法国鸡 (半只)

半份嘅烤鸡甫上枱,已经传出阵阵香味。师傅严格挑选嚟自法国农场嘅有机鸡只,用多种香料腌制同烤焗半个钟,令到各种香料完全渗入鸡肉当中,咸香惹味。而如果你有留意到,呢度嘅菜式,好多时都会有多种蔬食做伴碟呢,记住食肉之余都要食埋菜先至够健康=)


格陵兰鳕鱼配杂锦海鲜

海鲜控必点菜式,呢度一碟就有5种海鲜啦,主角当然系嚟自格陵兰寒带海域嘅鳕鱼,厚厚嘅鱼肉既鲜且甜,师傅仲预先起晒骨添,够贴心呢。另外仲有青口、带子、大虾同埋蚬肉,款款新鲜。而全碟最有惊喜嘅,系自家制嘅海鲜酱汁啊,鱼鲜甜味突出,绝对系锦上添花!


日本板腱和牛排(250 gram)

板腱和牛排嘅肉质一般较为实净,但同时肉味香浓,大厨炮制嘅烧汁令佢更为香口。切开时见肉色仍然粉嫩,食落仲好juicy添~ 


Kinship(中环)

上年开业嘅西餐厅Kinship来头唔细,由美国、英国名厨Chris Grare、Arron Rhodes主理,Arron Rhodes更喺多间米芝莲星级餐厅做过主厨添。两人皆重视食材来源同食物质素,以Farm-to-table嘅理念,尽力选用由农场直送到餐厅嘅纯天然食材。

橄榄油煮银鳕鱼配芫荽姜蓉、柠檬非洲小米及薯仔慕斯

以橄榄油煮过嘅银鳕鱼,肉质紧致,味道香甜,放喺柠檬非洲小米(cous cous)上,增加口感之余亦有种小清新。旁边嘅绿色酱汁则以芫荽同姜蓉混制而成,微辣渗香。


香烧西班牙八爪鱼配油醋培根及苦苣杏仁沙律

至於西班牙八爪鱼,制作功夫都唔少,又烤又煎,面层带有微微嘅焦,令人食指大动!橘黄色嘅酱料系源自西班牙加泰隆尼亚区嘅romesco酱,甜中带微辣,有层次感。


挪威三文鱼伴薯仔、焦糖洋葱及新鲜豌豆

三文鱼皮煎至香脆,咬落卜卜声,而鱼肉保持鲜嫩,兼且带有油香。底层嘅泡沫系带有甜香嘅茴香汁,无论喺视觉效果定味道层次上都为整道菜式加分!


冲绳猪柳配炭烤蕃茄酱、粟米沙律及浓缩罗望子酱

一片片嘅冲绳豚肉肉色粉嫩,肉质软腍,仲保留大部分肉汁,好juicy。师傅喺配搭嘅配菜同酱料方面亦落咗唔少功夫,酸酸甜甜嘅酱汁,有助减轻腻感,做到香而不腻。


Mr. whippy 雪糕

完美嘅一餐当然要以甜品作结,Mr. whippy 雪糕几乎系每枱必食嘅甜品,喺自家制嘅云呢嗱雪糕上,淋上酸咪咪嘅莓果酱,仲有几块脆口窝夫同白兰地脆饼,一啖食尽甜、酸、软、脆,口感丰富。


心动不如行动!有兴趣就快啲约埋三五知己去叹下美食!快啲bookmark定啦!

*以上图片只供参考,所有食品以实物为准. 食品供应因餐厅而异


关键字
中环
湾仔
大厨招牌菜
海鲜
健康
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
本月热门
【开饭热店大赏2020】气球艺术师为香港人打气:希望气球艺术愈来愈普及
7天前