米芝蓮台北版今年新登場，同港澳一樣率先公佈車胎人（Bib Gourmand）推介，即係出品有質素兼價錢經濟實惠嘅餐廳。台北首張車胎人推介名單有36間餐廳，當中有10間仲係夜市小食！
台灣美食多不勝數，而台北車胎人推介餐廳種類亦包括日本菜、滬菜、廣東菜甚至係印度菜，亦包括早餐的店例如阜杭豆漿，同平價小食店好公道金雞園。當中值得留意嘅係當中有八間牛肉麵店同五間台灣菜館。亦有10間店家嚟自台灣唔同夜市，似乎米芝蓮嘅評審同唔少香港人一樣，被台灣嘅小食迷倒呢。
八大牛肉麵推介
八間獲得推介嘅牛肉麵店，包括唔少遊客都識得去嘅嘅林東芳牛肉麵同永康牛肉麵，其他推介包括西門町人氣店牛店精燉牛肉麵、位於台北車站附近巷仔當中嘅劉山東牛肉麵。
仲有超過半世紀歷史嘅老山東牛肉家常麵店同清真中國牛肉麵食館、24小時營業嘅建宏牛肉麵，同低調小店廖家牛肉麵。
去勻夜市掃街
台北夜市當然亦係必去嘅熱點，今次車胎人推介嘅店家分佈喺五個夜市當中，上榜最多嘅係饒河夜市，有福州世祖胡椒餅、施老闆麻辣臭豆腐同陳董藥燉排骨共三間。而同樣廣受本地人同遊客歡迎嘅寧夏夜市就有劉芋仔蛋黃芋餅同豬肝榮仔成功突圍而出。
而南機場夜市嘅阿男麻油雞同臭老闆現蒸臭豆腐，臨江街夜市嘅梁記滷味同駱記小炒亦得到肯定。遊客必去嘅士林夜市就有海友十全排骨作為代表上榜。
古早台灣菜風味
圖：Cindy - Food Makes Me Happy，PennyChen0128
而五間得到推介嘅台灣菜館各有特色，茂園1971年成立，現交由第三代打理，繼續供應充滿古早味嘅正宗台灣菜。美麗餐廳亦已經傳到第二代，價錢相宜而且分量相當大，適合多人聚餐。我家小廚房就以家常菜為主，主打魚類料理。
想試下新口味？My灶就喺傳統當中加入新元素，例如招牌滷肉飯就加入豬油渣。而雙月食品就主打養生概念，牛蒡純雞湯、麻油燉雞湯等都係附近居民補身首選。