【食指动】Come on!去澳门一日食五六餐由朝食到晚!
2016-01-30

世人已经无法阻止香港人一有假就去旅行嘅习惯,就算系得个周末,都要近近地搭船过返转大海。冇计啦,要搵食嘛。我指搵好嘢食呀。得嗰一两日,梗系要争取时间食尽澳门嘅好东西啦!由朝食到晚,一日食五六餐一啲都唔过份呀。不过,quota有限、时间有限,去澳门搵食之前要做足准备呀!

澳门同香港有啲似,都系一个不夜天,无论系朝早6点几,定系凌晨2点几,一样都可以喺条街度搵到食! 今次就集中讲新马路一带嘅美食先啦。Check it out!


喺首页一揿,就可以由香港介面转咗去澳门介面喇,拉落少少就有埋地区拣,想自己set边个区喺首页都一样得。


好嘅一日由特厚蛋治早餐开始  南屏雅叙


Photos bysuzi1005 & owenverna & Lawrence Lau

南屏雅叙系澳门最古老嘅冰室,1968年开业到而家都差唔多有近半世纪历史。喺呢间两层高嘅老店,除咗食到佢哋独有嘅特式餐点之外,更加系份旧澳门情怀。一朝早去到,人多就一定㗎喇,当中有唔少都系澳门当地人喺度一边叹早餐、一边刨报纸,另外都会有啲赶时间嘅买完个包就走。

一场去到,当然就要坐低慢慢叹返个醒神早餐啦。识食嘅,一定系食特厚蛋治或者特厚叉烧蛋治,记得嗌烘底。话明特厚,当然有返咁上下份量啦,目测有成1.5寸高,听讲系用4只蛋炒㗎,又香又滑,食完又饱又满足!如果食得落,最理想就嗌埋份沙翁嚟食啦,而家唔系周围都搵到嚟食㗎。成个沙翁铺晒砂糖喺面,都算几松软,而且仲好香蛋味,好邪恶咩?都几㗎。不过香港人唔系愈邪恶嘅嘢愈锺意食㗎咩?


继续邪恶午餐:吉列猪扒包   胜利茶餐室

去澳门,食猪扒包是常识吧。不过猪扒包喺澳门相当普遍,大部分餐厅都有得食,随机入一间食又得,一早拣定间心水嘅又得。


想食咩都可以直接喺<搜寻-餐厅,菜式或食品>度打,好似我咁直接打猪扒包﹐就搵到晒澳门边度有猪扒包食喇!既方便又快捷!


呢间位於新马路,近营地大街嗰头嘅茶餐厅,装修比较旧,长方型旧式茶记格局,就咁睇同一般茶记冇咩分别。不过「舖」不可貌相,呢度就深藏咗令人一试难忘嘅猪扒包!


Photos by 龙格保

呢间嘅猪扒包之所以咁特别,就系在於佢块猪扒,唔系生炸或者生煎猪扒,而系吉!列!猪!扒!个size仲要大过块夹住佢嘅法式面包呀!块猪扒热辣辣,炸得嚟又唔会太乾,啲肉汁仲保留到。块包都唔弱,外层系脆嘅,咬落就好松软,成个包嘅感觉都几良好。呢度嘅虾多士同样出色,不过就唔系成日都有得食喇,想食到外层炸到脆一脆,里面嘅虾胶弹牙得嚟又有鲜虾味嘅金黄色虾多士,就要睇你嘅运气喇。


下午茶通街扫:葡挞X牛杂  玛嘉烈蛋挞店明记牛什美食


Photos by Cur & 高妹文迪

葡挞系去到澳门另一样必食嘅美食。行街行到咁上下,可以去呢间位於葡京同新马路之间嘅蛋挞专门店。蛋挞要热辣辣先至好食,而呢间店座落喺行人专用区中间,虽然本身店内冇设座位,但就都可以喺舖头门口嘅几张木枱木櫈度,即买即食。

呢度嘅葡挞,酥皮同蛋黄都烘到金黄色,仲有几粒「黑焦」喺面(唔知有冇人同我一样,觉得葡挞总系要有多啲啲黑焦喺面先至好食),酥皮香脆,牛油味重,层次分明,中间蛋浆部分幼滑得嚟亦充满蛋香,真材实料,甜甜der。美中不足系有啲油腻,垫住食嘅纸巾食完之後都索晒啲油。不过一餐半餐就算啦,咪谂咁多啦。但想食嘅,就要畀多少少耐性喇,舖头门口成日都大排长龙㗎。

而锺意食内脏嘅朋友就要留意了,澳门有间车仔档牛杂,充满街头风味,嚟到可以试下。呢间牛杂每日傍晚大约5点零6点先至开档,卖晒就收档。车仔档上面,卤水牛肚、牛肠、牛蒡、牛肺、牛柏叶……乜都有,一串一款咁买又得,一盒几款咁买又得,辣又得唔辣又得,得咗。啲卤水非常入味,全部都炆到好腍,而牛柏叶就好爽口,索晒啲汁,点忍?又或者应该问:点拣?如果同行嘅朋友唔好牛什,都仲有鱼蛋、鱼皮、萝卜、肠仔等等扫街小食可以拣,各取所需。


丰富海鲜晚餐  陶陶居海鲜火锅酒家


Photos by hongkonggunking & Cur

嚟到晚餐,当然要跟返全日队形,继续食好东西啦。入选米芝莲车胎人美食嘅餐厅,应该都算好东西喇啩,300蚊就可以食到三道菜。

日头食咗咁多肉,夜晚都系时候轮到海鲜出场啦。陶陶居喺澳门有超过70年嘅历史喇,呢间老字号会提供新鲜海鲜,喺门口嘅鱼缸度就可以见到啲龙虾呀鱼呀喺度游嚟游去,睇到流晒口水。叫返碟圣子皇啦,大大条用蒜蓉、粉丝、葱花嚟蒸香,最简单嘅煮法同时亦最能保留原条圣子嘅鲜味!另一道清清地嘅海鲜推介就系清蒸开边鲍鱼,有大约半只手掌咁大只,嫩口弹牙。


绵绵蟹粥宵夜   六记粥面

最後再食多餐宵夜都唔系好过份啫(好似系),喺澳门夜麻麻要搵食,其实都唔难。


入咗<进阶搜寻>就可以有筛选咁拣餐厅喇,例如要睇下边度夜麻麻都有宵夜嘅,就梗系搵<深宵营业>啦,搵咗先出发冇咁易撞板嘛。


Photos by milffy & lanelanemui

同样都系入选米芝莲车胎人美食嘅呢间餐厅,位於十六蒲附近,喺新马路搭车过去都唔系好远。虾籽捞面系吸引嘅,一条条幼得嚟又爽口嘅面条,撒晒一粒粒嘅虾籽喺面,系香嘅,嚟到澳门冇乜理由唔试。不过如果你个胃唔够大嘅,建议考虑要留肚食埋碗蟹粥。事关呢碗蟹粥份量都有返咁上下,用成2只蟹去熬,即叫即蒸㗎,个粥底又煲得好绵,2个人食嘅话,每人都可以食到4碗咁多。如果你幸运嘅,只蟹仲分分钟有蟹膏食到!

系,澳门去得多,有时已经唔知有咩好行,不过,食嘢嚟讲,依然都仲系可以由朝食到晚咁食足成日喎,大满足!仲等咩呀?OpenRice app已经全面Upgrade,下载了app的用户记得Update,而未下载的就到App StoreGoogle Play下载吧。咁得闲搵个周末咪又过下大海罗。



文:Kar

随时接收最新资讯
赞好OpenRice专页!

关键字
澳门
葡挞
猪扒包
蟹粥
新马路
开饭专题
开饭仔为你提供各类型最新饮食情报及优惠,全面照顾你的饮食喜好。
相关文章
【当时得令】氹仔旧城区隐世茶记叹瓦煲咖啡奶茶
2016-02-03
2017及历届米芝莲香港澳门指南完全版
2016-11-09
【当时得令】三盏灯周边的茶记隐世美食
2016-11-17
好新奇!KFC推出全港首部语音及体感侦测技术点餐机(有片)
2017-04-20
11月澳门美食美酒节 过大海嚐米芝莲星级大厨手势
2016-11-01
台北澳门轻旅行必睇 OpenRice订枱优惠攻略
2017-04-07
餐厅资料
更多
收起
本月热门
【知‧味20年专访】九龙塘美式意菜餐厅 经典菜式廿年不变 份量激多最啱分享
2019-11-25
【知‧味20年专访】扎根湾仔20年 墨西哥酒吧餐厅:「客人来是要食他们想要的味道」
2019-11-18