牛站(駅)麻辣火鍋放題

之前同朋友食過一次旺角分店嘅午市放題後，就已經mark落最愛食肆。今日約定朋友食埋佢嘅晚市放題，比較一吓有無分別。就朋友揀左嚟觀塘分店。先講環境，地方比旺角細，但可能相對無咁方便，人潮沒有旺角咁墟冚，所以比較靜，坐得舒服好多，攞嘢食亦無咁迫，個人其實較喜歡觀塘呢邊。今次晚市放題揀左個中價位嘅"SRF美國極黑和牛片‘’套餐，雖然牛肉無咁頂級，但肥瘦適中，肉質軟腍，慢慢咀嚼亦嚐到淡淡嘅牛香味，都算價錢合理。套餐亦包括封門柳，肉味當然較濃，不過size較細薄，要叫多幾轉才可以滿足到嗜牛嘅友人。
上次大推嘅脆口食物如響鈴、炸魚皮、炸饅頭等，一樣值得推介，同樣鬆脆香口；呢度嘅午餐肉都值得一試，厚切午餐肉煎炸得六面金黃，即使火鍋再浸過湯，亦依然挺身香脆。搵唔到上次好食嘅紫菜響鈴卷，不過就有油炸鬼，都一樣好食，胃口好嘅，真係唔可以唔食。胃口細d嘅當然就要揀返d無咁重澱粉質嘅，海鮮絕對唔好錯過。首先大頭蝦同沙白係必點嘅。大頭蝦隻隻漲卜卜勁可愛，肉質勁爽彈；而沙白真如其名-‘鮮甜沙白’，灼熟開口就見到每隻沙白都唔算細隻，入口無沙兼厚肉鮮甜。蘭花蚌上次已介紹過細細隻，但口感脆彈，似食刺身嘅鮮味。
熟食類先推介乳鴨、食過有d放題乳鴨會勁鹹，但呢度絕對唔係，而係非常惹味。再嚟係自助區攞到嘅生菜魚肉，生菜鮮甜，唔係街邊小食只食到生菜絲；而魚肉真心好味，魚味濃郁外亦做到彈牙口感。例湯足料，粟子腰果豬骨湯，輕易𢳂到大大舊豬骨同腰果，入口係老火湯嘅味道。邪惡火鍋一定要食蔬菜減輕罪疚感，第一次食紫白菜，揀佢係因為顏色勁靚，估唔到佢入口係勁甜，比大白菜好食好多。當然想再健康d嘅，就要食多幾棵羽衣金藍啦。最後食埋甜品，雪糕控嘅我一定係食Häagen-Dazs啦，呢晚就有雲呢拿、朱古力、藍梅、同埋焦糖脆餅四款口味，真係食多幾杯已感覺輕易回本。此外再食左個軟心芝士布甸，如果個胃仲有quota嘅，呢個都值得一試，因為芝士味幾香濃。總結係晚市食物同樣係性價比極高嘅，選擇多樣化，而質素上乘。同午市比嘅唯一美中不足就係最多只有120分鐘時限