中秋前夕借勢約朋友食飯做節🌕，我哋去咗K11新開嘅「稻埕飯店」。由於訂咗枱，去到可以直入，無訂枱嘅話又咁爆場，真係要等位！
餐廳都幾先進，我哋一坐低店員就為我哋送上手機紫外光消毒機同電子屏幕菜單🖥。
朋友唔大食(仲走澱粉質)🙈，所以我哋只係叫咗兩個小食、一份主菜同甜品。
鵝不是鴨肉(例牌)($98)，餐廳嘅菜式名食哂字，有趣有趣🤣。無骨鵝肉有七至八片，以台式白滷水浸製，所以唔會過重口味，食落清爽。
伴碟除咗令菜式變靚之外，亦讓食客進食鵝肉前後可以清清味蕾。其中包括薑絲芽菜同醃菜甫蘿蔔，後者好入味好好食🤤。
不夠．臭豆腐($68)，臭豆腐嘅造型精美，好似積木咁一件件搭住。從來唔食臭豆腐嘅我見佢唔係太臭🤣，所以㩒住個鼻試咗一件，原來食落係無乜臭味，而且非常脆口。
鹽酥豬扒滷肉台梗米飯($86)，以一個托盤咁盛住飯、豬扒、蛋同甜酸子薑。🥚溏心蛋流心效果一流；子薑偏辣，則作開胃之用。
滷肉飯選用台灣直送台梗9號米，🍚米粒飽滿，黏性較平日食開嘅強。滷肉份量多，肥瘦適中，仲有搭配椰菜。不過飯就唔算多，應該係單點Size。
鹽酥豬扒🐷超好食，而且大大件！炸皮又薄又香口，脆得嚟唔熱氣，炸衣同肉身並不分離，肉質鬆軟，正😋。
桂花酒釀丸子($36)，原來呢個甜品係熱食嚟㗎😳，丸子偏淋身，但都有幾多粒下；估唔到桂花酒湯嘅酒味都幾勁🍶，另外仲有好多杞子。
飲品方面🥤，我哋要咗凍桂花胚芽米水($32)同蜂蜜白苦瓜汁($38)。前者幾好飲，胚芽同米水好夾。後者係我朋友點的，味道無想像中咁苦，但都唔係我杯茶。
總括嚟講，飯店主打台菜，不過好多菜式都真係🇹🇼台灣原味道，好少喺香港嘅台灣餐廳見到，頗特別的！那些年的古早回憶在稻埕飯店...。
