假日餐牌有多款選擇，有全日早餐，沙律，冷烏冬，冲繩特式塔可飯，咖哩，pizza，湯飯，拉麵，湯烏冬，意粉，飯，飲品，同甜品。
今日每人叫左個主食再加一個小甜品分享。
吞拿魚沙律 $158 另加一
吞拿魚沙律大大兜，係新鮮爽脆沙律雜菜底伴有5片大大片煙燻吞拿魚，其他蔬菜仲有少見既長豆角，車厘茄同羽衣甘藍，仲有6舊香口熱辣辣炸薯角添。個蜜糖芥末醬好味又夠多。所有材料都好新鮮，吞拿魚質素都好好，仲伴有一件檸檬比你。
蟹肉小龍蝦意粉配龍蝦汁 $148 另加一
蟹肉小龍蝦意粉係大大碟幼身spaghetti意粉，撈咗鮮甜小龍蝦同拆好既蟹肉，仲有車厘茄同少少菠菜。意粉質感非常al dente，係我鍾意既口感。個自家製龍蝦汁味道都唔錯。仲伴有檸檬一件。面頭附送一條意式餅乾條，最後灑上少量芝士粉同香草。
時令水果梳乎厘班戟 $128 另加一
估唔到呢度都有梳乎厘班戟，仲有3款口味選擇，加一球意式雪糕加$20。梳乎厘班戟製作時間35分鐘。
果然慢工出細貨，三件梳乎厘班戟非常大件，隱隱聞到蛋香，食落果然非常之有空氣感，水準不俗！伴有非常香滑忌廉，送班戟食真係一流。鮮果有士多啤梨，藍莓同奇異果，連奇異果都唔酸。其他醬料仲有士多啤梨果醬同一兜蜜糖。
另外我仲加左一球意式雪糕，係雲呢拿味，食落又滑又香又厚身，正野！
今餐食得幾開心，食物質素唔錯。週日午餐時間呢個位置都差唔多滿座，果然旺場。
