源興美食 (已搬遷) 新店位置

尋日同同事兩個大男人去廟街尋寶，行行下見攰就四圍覓食，行到油麻地街市果邊見到呢間舖好似新開就走入去試下。環境乾淨，可能新開張，唔算多人。一入去就有個30歲左右既後生仔好熱情咁招呼我地，原來佢就係老闆。吹咗一輪水之後先知道佢係80後，16歲開始跟師傅學師，曾經喺龍皇、陶源等知名中菜館學藝。睇黎我地今日有口福啦！望落menu好多野揀，好似樣樣都唔錯，都唔知點揀。經過老闆一番介紹之後，最後我叫咗蜜汁叉燒飯，而同事就叫咗掛爐大鴨飯。老闆話新張期間$28一個餐，仲奉送例湯同野飲，心諗咁著數一定係迷你版，點知拎上枱見到個飯真係嚇咗一跳！個例湯係粉葛豬骨湯，火喉足而且食得出冇落味精，碟飯大到相信兩位女士share都食唔曬。試下個蜜汁叉燒，簡直驚為天人！香甜鬆化得黎好有肉味，拍得住西苑D叉燒。同事個燒鴨都好脆皮，啖啖肉肥而不膩，簡直係男人至愛！另外值得推介既係佢個咖哩，聞到隔離枱食都覺得好香。可惜今日食得太飽，冇機會再食，唯有等下次。師傅話佢初出道果時係喺鵝頸橋清真惠記學師，唔怪得之咁堅。不過呢間野一D都唔易搵，喺油麻地街市新填地街同北海街交界，唔留意就會miss咗。