小皇府 (MOKO新世紀廣場)

营业中

休息中

侍应们—好细心醒目，见一行七人冇订位，安排两张连接隔胶板细枱外，再拍多咗方形枱嚟加长。加茶加水快唔驶提，笑容满面。XO酱煎肠粉—超香热辣辣，无端变成开胃小食，咸淡适中，食指大动。芝麻蛋散—平时嫌佢又厚又甜到呕，呢度整得佢好松化，糖浆亦清甜，想食多几件。豉油皇龙须炒面—鱿鱼须虽然偏少，但又系好惹味，炒得够镬气。南乳猪手捞面—猪手炆得够腍入味，捞汤有韮黄碎同虾籽，比一般中式捞面伴汤浓味，面质爽口弹牙。鲜茄上汤鲜竹卷—番茄同鲜竹卷似乎有啲错摸，有啲突兀唔多夹，还好茄蓉唔酸，执番身彩。鹌鹑蛋烧卖—愈嚟愈多中式食府唔整喇，味道本身都系啲猪肉加粒烚蛋，纯粹怀旧。小蜜蜂🐝流沙包—颜值抢fo ，size的式，记得外貌多于内「馅」。葱花炸两肠粉—炸两已经唔脆。如果当睇演唱会，呢味绝对系厕所位。咖哩土鱿—土鱿始终用咗水发并非鲜鱿，预咗冇鱿味，但几欣赏调呢个咖哩汁，香浓唔呛，甚至用嚟捞吓陈村粉。