黑麥 (已結業)

新一年到銅鑼灣幫襯呢間食店，11:30去到已經排晒長龍，大概排咗個半鐘，終於入座。店內環境因落地玻璃關係，好光猛同開揚，感覺都尚算舒服。四人行叫咗4個Set 分別係：-1. 辣肉腸長通粉 （親友意見都幾辣吓，其他一般。）2. 燴羊肉扁意粉 X 2 （羊肉味好濃，肉質嫩而唔黐牙，醬汁唔太咸，扁意粉略淋。份量對女士嚟講係適中。）3. Egg Benedict 跟肉腸 (有沙律菜伴碟，半熟蛋下面有一片疑似炸過嘅煙肉，底下再墊上一片有提子乾嘅麥包，上面淋上酸酸甜甜嘅荷蘭醬。水煮半熟蛋略嫌熟咗啲，蛋黃唔夠流芯，冇乜流出嚟嘅感覺，變咗黏黏口感。煙肉食落硬得嚟脆，冇燶味。麥包麥味十足加上提子乾比較濕潤，香草肉腸煎得香香，唔錯）隨餐有；-青豆湯，豆味香但略稀。餐包有兩款，一片片麵包食落表面香脆內軟。當日餐飲熱咖啡☕️X 2、凍咖啡同牛奶咖啡齋飲唔加糖同奶飲就最能夠品味到香濃。牛奶🥛好似一般沖咖啡嘅奶咁。服務方面好熱誠，雖然好多客，但係都有耐性同冇出亂子。