龍蝦寶寶 (已結業)

隊長係好鍾意食龍蝦，知道有間專食龍蝦小食既舖頭，但次次唔係無開檔，就係裝修，一直都食唔到，隊目行過見到搬左新舖，一於就擇日去食。一睇見個menu⋯⋯$128個龍蝦早餐！？嘩！唔知有幾多中環人會朝早食個甘富貴既早餐呢？不過呢個係all day breakfast，全日都有得食，我地就無食勒，因為隊目好想食龍蝦碗仔翅⋯⋯但賣晒，得番濃湯烏冬同叻沙，唔食辣，唯有揀烏冬。我地揀左一個普通濃湯烏冬，一個芝士濃湯烏冬，檯面既蔥、乾蒜、蝦子都係任加的，試一啖乜都未加既龍蝦湯，都幾濃龍蝦味，不過加番少少蝦子吊下味會再好d，至於半隻龍蝦，好似有芝士香口d，不過龍蝦肉好嫩，$128碗麵，比半隻龍蝦，仲要有甘既水準，我覺得值囉。我地再叫埋龍蝦腸粉同炸龍蝦雲吞，相對上龍蝦腸粉會好d，不過龍蝦肉就明顯唔夠碗麵既甘靚，鞋口的，不過佢切到細細粒，撈埋唔係特別滑既腸粉一齊食都可以的。至於個炸雲吞，粒龍蝦肉奇細，應該得腸粉果d龍下肉甘細粒，似食錦鹵雲吞多d。雖然有點貴，不過如果食果碗龍蝦烏冬係值既，起碼抵食過百幾蚊既龍蝦包先～