珍煮丹 (已結業)

黑糖珍珠鮮奶今期最heat，飲到又老虎，又幸福咁，呢間都唔輸，好多人讚好，亦都排晒長龍。有朋友意大利返嚟，我梗係要介紹下佢嚟飲呢杯香港最潮最新嘅黑糖珍珠奶。我地一齊排隊，雖然長龍但好彩好快。menu 好多野揀，但字細到癲，我盲嘅差D睇唔到 😂 之後我加碼要左黑糖珍珠紅豆鮮奶。朋友想要黑糖珍珠奶茶，但menu無一個item係寫住奶茶，於是問收銀妹妹，原來係改左名叫黑糖珍珠伯爵拿鐵，但拿鐵 (Latte)意大利文嘅意思明明係解作奶，咁何來有茶既意思？ 媽呀，文化混淆呀！🤯 然後朱古力拿鐵又無茶又無咖啡，聽到更混亂 🤯🤯🤯 講返我杯黑糖珍珠紅豆鮮奶(左邊)，真係好好味😋加左紅豆蓉，多一種紅豆香味，多一種味覺享受。黑糖珍珠又香黑糖味，珍珠質感煙韌。珍珠份量都幾多，飲極都有 😂 不過飲完呢晚覺得有少少頂胃，應該係因為珍珠幾難消化。朋友要杯黑糖珍珠伯爵拿鐵(右邊)，黑糖珍珠同奶當然一樣咁好味，但伯爵茶就話只係飲出普通茶味，無伯爵茶獨特嘅香，少少失望。Overall, 我覺得值得一飲。