新南苑雞煲小菜點心

見完客係黃大仙竹園村附近，見到一間小菜館有齊曬雞煲同小菜✨啱晒選擇困難症嘅我👍🏻

一入餐廳已經聞到雞煲嘅味，即刻同朋友嗌返個，嗌咗小辣試吓。呢度嘅雞煲只係$198，好抵食！ 

雞煲上枱超！級！香！原來仲有跟埋油炸鬼同生菜，好似食羊腩煲咁呀😆😆芫荽同芹菜嘅份量都好多，索晒啲汁好好味！

眼利嘅朋友見到好多台都有叫煲仔飯，於是我哋叫咗黃鱔煲仔飯試吓🍲一上枱已經聞到屬於煲仔飯嘅飯香，一打開仲驚喜，每一粒飯都沾滿醬油，黃鱔嘅份量都好多，真係忍唔住一啖接着一啖咁食🤤食到最尾仲有飯焦！正到爆！

食完呢餐勁滿足✨性價比一流👍🏻下次一定要再嚟試吓佢嘅全日點心同酸菜魚🐟