鬼金棒

营业中

休息中

銅鑼灣依間日本過江龍「鬼金棒」我一直都幾鍾意，佢哋嘅湯底係真係會食到麻、辣嘅味道，而唔似平日常見辣嘅日本菜式係走一個甜辣或香辣嘅路線，因為餐廳嘅拉麵湯底係採用赤味噌混合卡羅萊納死神辣椒調成嘅唐辛子及和歌山葡萄山椒調成嘅香麻油而烹煮出嚟嘅，所以好鬼正，另外，依間拉麵餐廳亦係比較罕見地無收取加一服務費，但服務唔錯，上菜速度快，而且有提供食水飲用。莞荽辣麻味噌拉麵加配味玉（單點$130），中辣中麻，表面鋪滿芫荽，湯底辣度、麻度3分，配料包括有珍珠筍、豆芽菜，豆芽菜份量多，味玉溏心效果突出，蛋味濃香。辣麻味噌拉麵（單點$95），高辣高麻，表面鋪有京蔥、香蔥、卡羅萊納死神辣椒唐辛子，湯底辣度、麻度5分，拉麵口感軟硬適中，容易掛湯，五花腩肉質肥瘦相間，口感軟腍，食落充滿滷汁味道，配料包括有珍珠筍、豆芽菜。煎餃六隻（單點$45），即叫即煎，外皮口感香脆，內有椰菜、豬肉，肉汁飽滿，配以特調香辣醬汁食用，食落好惹味。