龍如海鮮酒樓 (已結業)

鯉魚門亦係食海鮮出名嘅地方，呢一站嚟到鯉魚門，順順行吓睇吓呢度有少少鄉村感覺嘅地方。我哋都行咗海鮮街一陣，諗緊幫襯邊間，最後揀咗比一個非常熱情嘅姐姐拉咗去揀海鮮。之前聽人講話鯉魚門都幾貴，兩個人食咗六樣嘢，我覺得價錢可以接受，味道都還可以。半斤蝦，蝦新鮮，都算大隻。揀咗一條細嘅象拔蚌。膽用嚟椒鹽，好香口，好好味。身就做刺身，新鮮又爽口，切得夠薄身。蒸扇貝，無落豉油，但係我反而覺得淡淡哋先食到鮮味。芝士龍蝦伊麵底，汁嘅色好黃，味道一般，唔夠重芝士味，汁多料少，龍蝦無咩肉。辣酒煮花螺，呢個唔錯，我唔食得辣都食到，幾香。均衡啲食返碟菜。