新泰東南亞餐廳 (太子集團中心) (已結業)

見近排冇乜食泰國菜，同埋天氣都比較熱，所以都諗起食泰國嘢比較開胃，就去咗尖沙咀新泰東南亞餐廳，我哋叫咗個日本南瓜焗海鮮飯、燒原隻魷魚 、麵包焗咖哩軟殼蟹、同埋一杯芒果沙冰。今次第一次食日本南瓜焗海鮮飯，d飯釀係個南瓜入面有濃濃嘅南瓜味，入面d南瓜肉都可以拔出嚟食，都焗到好冧好香，南瓜味加埋海鮮嘅味滲曬入飯度食，加上表面有好多芝士醬，呢個係必食之選。而原隻魷魚就燒得好香，點酸辣汁食好開胃。而最後個麵包軟殼蟹又係十分好味，始終覺得新泰嘅咖哩好好味，d麵包索咗啲咖哩汁食超惹味，軟殼蟹又多又香脆，點埋個咖哩汁食又係啖啖鮮味。而最後個芒果沙冰就最啱夏天飲又解渴，食完曬嘢飲返杯芒果沙冰，好似都幫助容易都消化。