餐廳位於Sogo附近既商業大廈15樓，面積唔算太大，由於枱與枱之間都有一段距離，所以全場只有約三十個坐位，整體格局喺香港呢個串金尺土既地方真係好少見。當晚雖然只係得兩個人，但佢地驚我地「唔夠位擺野食」，好大方俾左張四人枱，即使講秘密都唔駛就住就住，細細聲驚死隔離聽到啦！
椰青 ($38) 及凍薏米水 ($28): 椰青大大個非常多水！三十幾蚊有個咁大既椰青而唔係「得個殼」既椰王，重要咁大個咁多肉添真係非常少見！薏米水方面，即使叫左少冰整體口感亦都唔算太甜，而且薏米亦都煲到好腍非常之易入口，正！
新加坡喇沙 ($88): 湯底非常正宗，少少辣之餘又食得出有淡淡既椰奶味道，滲晒入豆卜同埋芽菜之後一口咬落去既口感真係一流！材料方面亦都誠意十足，冇諗過竟然有成三四隻手指尾咁長既大蝦添，正！
1
招牌海南雞 (例牌) ($98): 絕對係必食之選。坦白講收得呢個價錢都估到係冰鮮雞，真係要讚個廚師居然可以泡製到佢一D雪味都冇。「雞有雞味」呢D老土野唔講喇，但最值得「like」既係坊間依家買少見少、喺雞肉同皮中間一層薄薄既油脂都能夠做到，值得推介！
馬拉盞通菜煲 ($88): 鑊氣十足，馬拉盞同埋蝦米撈埋通菜之後既感覺非常之match，唔太鹹之餘又唔會乜野味都冇，鍾意食炒菜既朋友絕對要一試！
新加坡肉骨茶 (small) ($88): 同平時見到既「一盅盅」肉骨茶唔同，呢度既「油炸鬼」係同個茶分開另上既，咁就唔係擔心俾D湯浸到淋晒啦。另外，餐廳方面十分細心，用左平日快餐店打邊爐常見既保暖窩heat住個肉骨茶，所以即使食到尾聲時D食物都唔會凍晒影響口感，抵讚！
味道方面，湯底絕對落足料，飲得出至少落左好幾種唔同既藥材，當D油炸鬼同豆卜浸喺湯一少陣再攞出黎食落口既感覺真係超正！肉骨方面亦都煲到好腍，完完全全咁吸晒湯既味道，骨同肉更加能夠「一拆即散」，睇得出廚師喺食物質素方面落過工夫，唔係馬馬虎虎、求求其其就算！
總括黎講，呢度絕對係銅鑼灣鬧市一個飯聚既好地方。即使係平時晚市既peak hour都唔會太多人，就算食完野都可以小坐片刻，唔駛擔心一食完飯就會俾人「D野重要唔要」式問候趕走！員工方面亦都非常細心，經常提醒客人要小心注意盛載食物既器皿「辣手」同埋「唔該前、唔該後」，值得一讚！
