蛋糕我揀左鐵觀音芝士蛋糕，蛋糕面頭加上朱古力醬、鐵觀音啫喱、脆脆，冇咁單調。蛋糕上層係鐵觀音慕絲，質地厚滑，茶味突出而甘香，下層係原味芝士蛋糕，茶香同芝士香各佔一半。鐵觀音啫喱有淡淡茶香，同蛋糕夾得黎又可以中和芝士蛋糕嘅膩，呢個組合確實唔錯~
飲品我叫左期間限定嘅奶蓋荔枝茉莉茶，佢係用時令新鮮嘅荔枝汁整，清新得黎又唔會死甜。奶蓋都幾厚，接近三分一杯都係奶蓋！奶蓋嘅奶香唔錯，夠濃郁~ 奶蓋同荔枝茶鹹甜交集，荔枝嘅香甜同茉莉嘅清香又好夾
身為荔枝控嘅我對呢杯飲品好滿意
老闆娘送上飲品嗰陣提我要大啖啲飲，咁先可以一次過飲到兩層，幾貼心
我地臨走時老闆娘問我地蛋糕好唔好食，睇得出佢地好着重食物品質，亦好有心機做好間café。鍾意飲茶或茶味甜品嘅朋友要黎試一試，支持一下咁俾心機經營嘅小店啊！
