新泰東南亞餐廳 (已結業)

近排疫情問題，但又約咗朋友2個人食飯，想搵好坐嘅地方，又坐得闊落啲，所以嚟咗新泰東南亞餐廳食泰菜。侍應安排咗卡位俾我哋，坐得好闊落，好有泰國風情。食泰菜點可以唔叫椰青，近排天氣轉熱，飲椰青解熱，大大個，仲好清甜。豬肉碎生菜包，豬肉配泰式香料炒得非常入味，辣辣地，好開胃。泰式生蝦，非常新鮮，肉質彈牙，配埋辣椒、香蒜同醬汁，更能提出鮮味，值得一讚。炸蝦餅，炸得非常香脆，又彈牙，配甜酸醬一流，不過兩個人食好似太多。串燒沙嗲，豬肉、牛肉同雞肉各一串，沙嗲汁非常香濃，越食越滋味。尤其雞肉肉質非常嫩，一定要叫。泰式蝦炒金邊粉，外層蛋皮煎得非常靚，而且大蝦爽口，金邊粉調味開胃，我同朋友都讚不絕口。太耐冇去過泰國，最掛住一定係芒果糯米飯。餐廳嘅芒果非常甜，估唔到喺香港都可以食到，而糯米飯有分紫糯米同白糯米，口感煙銀，配埋椰漿非常好食。