醉胡爐 (已搬遷) 新店位置

其實一向都好鐘意打邊爐! 有朋友介紹醉胡爐，話好好食喎，咁就趁新年同d朋友食團年飯就一於試下佢啦! 佢個位置都算方便，地鐵站行十分鐘就到啦。我地book左食7點，去到個陣冇乜人但係坐坐下都係滿座既。可能太多人既關係，職員未必及時招呼到，不過佢地都維持到好好既服務態度，都好勤力幫手換碟同埋收野，呢一方面值得欣賞。講下佢個環境先，環境乾淨企理，而且每張枱都非常之大，我地6個人仲夠哂擺埋d食物係枱面。肉類方面，我地叫左飛驒和牛肉眼A5同西班牙黑毛豬豚肉。飛驒和牛油脂分怖平均，食落又唔會覺得肥膩。黑毛豬豚肉有驚喜，肉質嫰滑，又唔會韌，十分好味。鍋底方面，我地係叫左火焰龍蝦海鮮鍋同埋冬瓜花膠雞翅鍋，兩個鍋都真係好出色，唔係講笑。海鮮鍋有龍蝦、蜆及蕃茄，龍蝦大大隻好甜食落好有口感，絕對推薦！蜆肉鮮甜美味味道不錯！雞翅鍋有有鮮雞，花膠，瑤柱，金華火腿，素翅等等食材。如果唔叫火鍋料，真係剩食湯料同飲埋湯都飽左一半。隻雞d肉好嫩好好食，食得出唔係冰鮮貨，花膠都夠厚肉，認真推薦！蘇格蘭特大聖子，灼一陣就可以配醬汁進食，肥美新鮮口感豐富！特別推介 紫菜響鈴卷！好似話係每日舖頭新鮮即炸，比平時食開既響鈴卷更脆