餐廳座位不多，眼見都係做熟客為主，師傅們同客人都有講有笑，當然包括我嘅朋友，原來佢成日光顧，仲盛讚呢度出品一流之餘私隱度又高。
餐具都充滿日式風情，我就特別鍾意佢嘅貓貓筷子托。
我哋叫咗2個$580嘅sets，首先有前菜。季節前菜內有雞肉、冬菇、蘿蔔、蒟蒻，全部煮得好入味，鹹鹹甜甜的感覺真係令人好開胃。
然後就食刺身，時令刺身盛分別有帆立貝、甜蝦、八爪魚同蟹籽，刺身用料新鮮，所以每件都份外鮮甜。
日本時令生蠔真係好嫩滑，上面仲加有甜醋啫喱，令生蠔嘅鮮味更加突出。
然後其中一個主食就係shabu shabu，湯底可以選擇昆布或者醬油，我哋就揀咗比較清嘅昆布。
Shabu Shabu配以日本產黑豚盛合，黑豚肉肥瘦適中，味道甘香，而且有足足200g，絕對能滿足。
另外仲配有野菜盛合，分別有白菜、旺菜、粟米同本菇，令湯底更鮮甜。
淨係呢個Shabu Shabu都已經食到好飽。
我自己就鍾意先放蔬菜，然後再一路食豚肉一路讓肉汁滲入蔬菜入面。
另一個餐嘅主食係備長炭串燒。店員首先會問有冇食物禁忌，然後再由廚師發板。首先出場嘅係燒雞肉串，分別係雞軟骨串同醬燒雞髀肉串，用備長炭燒嘅串燒份外脆口，燒得香脆之後灑上薄鹽，味道出色。
然後出場嘅係白鱔串同牛舌，白鱔串肉質非常肥美，魚皮燒得香脆。牛舌則配上味粉，肉質彈牙。
其後就係燒雞翼，選取咗雞中翼同雞翼尖嘅部位，由頭到翼尖都燒得香脆。
第六款就係燒粟米，粟米新鮮而清甜，加咗牛油就更香甜。
炭燒時令貝類係一份帶子，帶子已經處理過，將佢一分為二，除去內臟保留帶子裙邊，用上湯再煮成，上湯同帶子原有嘅鮮味混合令味道更出色。
日本時令水果係蜜瓜，味道清甜，而且仲好多汁。
我哋仲叫咗飲品，木村飲料分別揀咗信州蘋果汽水同完熟白蜜桃梳打汽水，味道好香又唔太甜，為呢餐盛宴畫上完美句號。
