影片
更多
2008-12-23
12 浏览
21-12-2008都講過, 九龍城係得泰國0野 / 潮州0野特別多, 但其實越南0野 5 隻手指數得晒, 其中有 d 仲要幾港式... 早兩日終於見到一間新的越南餐廳開門, 仲要幾靚裝咁款, 一行 4 人晚飯0黎試試.- 牛肉米紙卷: 餡料有紅蘿蔔絲, 檬粉及乾乾0鞋的牛肉「渣」, 米紙幾煙韌, 但實在捲得散收收, 咬一啖後立即「解體」, 真係 -_-" 奉上的醬汁味道十足「海鮮醬」, 唔太0岩食, 結果自行落酸酸甜甜的魚露送米紙卷, 仲好食.- 馬拉盞炒椰菜: 馬拉盞幾香口, 但鑊氣唔夠, 椰菜腍腍濕濕水汪汪, 食味大減.- 沙爹串燒: 叫了豬肉及雞肉各 3 串... 雞肉好嫩好腍好多肉汁, 正! 豬肉肉汁亦夠, 都好食; 沙爹汁雖然唔及九龍城廣場對面檔印尼串燒出品的 (見 http://www.openrice.com/restaurant/commentdetail.htm?commentid=1947883), 但都幾香濃, 好食.- 無食香茅雞翼, 賣相唔錯, 唔知好唔好食?- 火車頭: 湯底好差, 淡得很不能接受, 唔似牛湯之餘, 合埋眼飲的話, 你話係史雲生
都講過, 九龍城係得泰國0野 / 潮州0野特別多, 但其實越南0野 5 隻手指數得晒, 其中有 d 仲要幾港式... 早兩日終於見到一間新的越南餐廳開門, 仲要幾靚裝咁款, 一行 4 人晚飯0黎試試.
- 牛肉米紙卷: 餡料有紅蘿蔔絲, 檬粉及乾乾0鞋的牛肉「渣」, 米紙幾煙韌, 但實在捲得散收收, 咬一啖後立即「解體」, 真係 -_-" 奉上的醬汁味道十足「海鮮醬」, 唔太0岩食, 結果自行落酸酸甜甜的魚露送米紙卷, 仲好食.
- 馬拉盞炒椰菜: 馬拉盞幾香口, 但鑊氣唔夠, 椰菜腍腍濕濕水汪汪, 食味大減.
- 沙爹串燒: 叫了豬肉及雞肉各 3 串... 雞肉好嫩好腍好多肉汁, 正! 豬肉肉汁亦夠, 都好食; 沙爹汁雖然唔及九龍城廣場對面檔印尼串燒出品的 (見 http://www.openrice.com/restaurant/commentdetail.htm?commentid=1947883), 但都幾香濃, 好食.
- 無食香茅雞翼, 賣相唔錯, 唔知好唔好食?
- 火車頭: 湯底好差, 淡得很不能接受, 唔似牛湯之餘, 合埋眼飲的話, 你話係史雲生湯溝大量熱水我都信! 奉上的配料有一籃九層塔及一小件青檸, 不過落埋落去, 作用亦不大; 河粉幼身,「發大度」幾嚴重; 配料就係 standard 的火車頭配料, 味道不過不失. 令人幾燥底的一碗火車頭, 絕不推介.
- 啤酒焗肉蟹: 好唔客氣地食了隻大蟹箝, 肉質結實, 味道鮮甜得不得了, 正! 啤酒味就落晒 d 隻蟹下面 d 蛋白度, 食落甘甘, 帶啤酒清香, 好食.
食到呢度, 大家個胃仍然有位, 又叫了兩份甜品 share 食:
- 薑檸焦糖燉蛋配0云呢拿雪糕: 創意搭夠, 食味好麻麻 -- 面頭火炙得過(火農), 黑色一撻撻的, 下面燉蛋就極度乾身0鞋身, 皺晒皮的, 樣衰又難吃. 味道就薑味大過檸味好多, 唔0岩食; 0云呢拿雪糕就唔香唔滑, 可以不試.
- 香蕉批: 店員們的極力推介 (「我0地好鍾意食0架~!」) 其實係 banoffee pie, crust 極硬, 鐵刀鐵叉都拮唔落, 真係... cream 極多, 可幸唔會杰撻撻, 呢個 light light 的感覺不錯; crust 同 cream 中間就有少量香蕉及 toffee, 除0左太生所以味道帶酸澀 (!!) 的香蕉之外, 味道 ok 啦.
食物一般, 環境就好好, 白雪雪的裝修好優雅, 俾人感覺好舒服; 招呼就好「生手」feel, 落單時我0地一路講, 女店員淨係眼光光望住我0地, 唔會寫低的, 但自己記性又麻麻, 搞到覆單錯到九彩, 結果我0地講完一次食咩, 又要由頭慢慢講多次 (同埋要(目及)實 make sure 佢真係寫低先夠膽繼續), 頭都出煙.
連加一每人約 $140, 當食裝修吧.
张贴
