滿記甜品 (西港城) (已結業)

今日食完叉燒燒鴨瀨粉，點知唔飽，行吓行吓去到滿記見無咩人，於是就入去。上環嘅滿記係西港城入面，落地玻璃嘅設計，每次搭巴士經過時都會見到餐廳內嘅情況。餐廳嘅一面牆用上書架牆紙為背景，遠看都幾可亂真，以為自己係圖書館。店內座位舒適，有梳化位，亦有藤椅位。餐牌選擇多配搭，有啱冬天嘅熱糖水，亦有滿記招牌糖水，最後我揀咗楊枝甘露和榴槤糯米糍。不過今日無晒榴槤糯米糍，唯有轉食芒果糯米糍。唔知係咪檯號係同隔離位一樣，店員一係就將我叫嘅食物奉到隔離檯，一係就手持另一碗糖水時見我已經食緊糖水，行到埋嚟之後又走番轉頭，其實佢手個碗係隔離檯嘅，情況有點混亂。今日主打芒果，冬天想食芒果，去甜品店就最好，所以叫咗芒果糯米糍同楊枝甘露。先食芒果糯米糍，椰絲滿佈，芒果糯米糍呈淺黃色，相信係糯米粉加入芒果汁。糯米糍食落好煙韌，內裡新鮮芒果餡香甜，一次過食晒三粒，唔會唔夠喉，嘻嘻。楊枝甘露芒果汁底金黃色好吸引，粒粒芒果都好甜，只係有一些柚子有點澀，扣咗少少分。食完楊枝甘露同芒果糯米糍，好滿足。離開時見到西港城嘅賀年裝飾，可以打鼓，轉風車同許願，我仲轉咗吓風車，即刻身心舒暢。