円相

营业中

休息中

一間以居酒屋形式經營嘅日式餐廳，店內擺滿各式各樣嘅酒，雖然我同朋友都唔係喜愛杯中物，不過，試下佢地嘅日式食物應該都唔錯。首先有精緻嘅燒茄子串，燒過之後嘅茄子，味道變得格外清甜可口，絲滑細膩，令人回味。賣相好吸引嘅係蒜香牛柳粒黑醬油炒飯，食落蒜香及黑醬油勁濃香，互相配合，天衣無縫，而且每啖都食到鮮嫩嘅牛柳粒，飯粒分明，份量十足，令人食過不停，非常滿足。火炙明太子山藥煎更值得推介，大大粒明太子舖滿在煎香嘅山藥上面，喺融化緊嘅狀態下，增添綿密口感，食到惹味又鹹香嘅明太子，零舍有風味，大家一定要試吓。仲有玉子燒，好靚嘅淡黃色又大件嘅玉子燒，上面舖咗木魚絲，好吸引。入口非常幼滑，仲有微微蛋香甜味滲出嚟，十分滋味。再有蒜香厚切牛舌芯串，燒得夠焦香，醃味適中，肉質厚實，咬落好有口感，唔會靭，果然夠新鮮好味呀！特別值得一提，有一男一女嘅服務員，待客有禮，服務體貼，值得欣賞，令我地好想快啲約埋三五知己再嚟一趟！仲有好多酒可以飲！