尚賓樓 (已結業)

今晚娘親大人因為有一張二至五人送半隻雞coupon而指定嚟呢度食飯，裝修喺屋邨商場嚟講算係頂級架啦，每個卡位都有薄電視，一入到原先比張五人枱我哋，但個經理見我同細妹牛咁眼望住個卡位，即刻主動同我哋提議換卡位比我哋，唔錯!!入座後，咁我哋點菜啦，阿經理又提醒我哋使唔使等埋齊人先上菜(娘親大人竹戰未歸)，因為佢哋上菜只須五分鐘，夠窩心；到娘親凱旋歸來，即刻嗌起菜，真係五分鍾內到喎，啲嘢係熱架。重有，佢送果半隻雞都唔差架。順帶一提，我哋叫咗個揚州炒飯，因為menu上面係無架，咁阿姐話唔知幾多錢，大概52蚊度啦，跟住食到一半，阿姐又主動同我哋講番只係$45蚊，夠老實。講真，呢間嘢食物質素普通啦，唔難食囉，但啲阿姐全程密密refill茶同埋問親嘢都好好聲氣，足以叫我下次再同屋企人再嚟；始終，食物質素固然重要，但服務都一樣重要。