。因為唔係特別節日，所以早一個禮拜訂枱都有位；當日所見，入坐率大概7、8成。
因為係私房菜既關係，菜式要一早寫定。訂枱之後，店員就whatsapp左個餐牌俾我地揀餸，最後叫左⋯
－ 醉豬手，$64/8件
－ 麻辣鴨舌，$68
－ 杏汁炖白肺，$198
－ 椒鹽雙拼，$98
－ 鍋貼小棠菜，$138
－ 蝦籽竹笙豆苗卷，$148
－ 蒜蓉蒸開邊蝦，$158
－ 金牌牛助骨，$188
－ 炸乳鴿x1，$58
－ 豉油皇乳鴿x1，$58
－ 蒜香蟹油炒麵，$68
－ 艇皇浸時蔬，$68
－ 壽桃x8，$8/個
－ 杏仁茶x4，$18/碗
－ 川貝炖雪梨x2，$38/碗
－ 杏汁炖木瓜x2，$38/個
唔計甜品都嗌左10餸1湯
果然係為食家族。本身仲諗住每款乳鴿各2，店員建議各1就夠食。最後都食得哂，因為我地真係好大食
醉豬手係招牌菜，整得好腍好入味呀！而且酒香撲鼻！必食推介。麻辣鴨舌同蒜蓉開邊蝦都唔錯；蒸蝦夠味又夠鮮，份量都好足，雖然蝦係細細隻既，但係都食得好滿足。
同媽媽出街食中菜，湯一定要揀款多功夫、平時佢少整既，唔係實會哦足成晚。白肺湯真係功夫菜，要將個鮮紅色既豬肺啤水啤到變成全白色，實在係好多功夫。除左豬肺，湯渣仲有菜乾、雞腳、南北杏，好足料、成個湯都好香；我地人多，分得一碗有D唔夠喉⋯
鍋貼小棠菜就整得麻麻地，冇嘜味咁，又唔夠脆身。牛助骨太乾、肉有D韌
甜品都有少少失望。我食杏仁茶，食得出係粉開既(因為入口有少少未溶哂既粉、一舊舊咁)，而且太甜。炖木瓜同雪梨就好似幾好
壽桃個碟可以要求寫字，中菜比較少見，幾有心思
食物不錯、價錢都係相當合理(我地8個人嗌左咁多餸都係$1900，真係幾抵)；不過環境真係
唔係講舖頭入面既環境；店面好乾淨、佈置亦都算有心思。但係地下電梯大堂真係好差呀！！唔係要求一個好靚、好別緻，始終都係工廠大廈。但係依個大堂真係太噁心喇⋯環境昏暗、一個角落頭有裝修廢料、一個角落頭有幾袋垃圾、有一陣垃圾房既臭味。經過個大堂，已經冇哂胃口⋯
強烈建議大家唔好行去電梯大堂果邊，由觀塘道入口行入去、直接上樓梯啦！
