極尚大喜屋 (銅鑼灣廣場一期)

营业中

休息中

今日黎銅鑼灣嘅極尚大喜屋食午市放題，坐位好寬敞，坐得好舒服。依家有qr code 落單好方便。野飲有得揀一般汽水，無糖系列都有架，亦有自家冷泡茶可以飲，我就揀咗白桃烏龍茶，清淡解渴唔會太濃，亦好細心有熱飲櫃。上菜速度幾快，手機落完十分鐘內都有，熟食夠熱辣辣。佢啲灸燒壽司好好食，尤其是左口魚壽司，唔會太肥膩，又有甘香，幾推薦。三文魚刺身比較厚切，食落有口感，油脂唔算好肥，一啲魚腥味都冇。希靈魚刺身就好有鮮甜味，忍唔住嗌多客食！燒物方面我覺得燒菠蘿唔錯，本身夠甜亦好多汁，中和番其他大味嘅菜式。燒羊架算tender，冇乜膻味，配上簡單嘅黑椒粒已經好開胃。牛肉壽喜鍋湯底香濃，醬油湯香甜，牛肉片同娃娃菜好入味，熱辣辣嘅湯加上生雞蛋撈埋一流！甜品方面有啲少見嘅韓國牌子雪條雪糕，其中有朱固力堅果脆皮雪糕，同埋珍珠奶茶雪條。咬落真係有粒粒珍珠，配上濃厚黑糖味，十分之滿足啊！下次一班人聚會都會選擇黎呢度食多次，環境同上餐速度都令我想回頭。