因為真係好耐冇出街食，最近疫情算係緩和咗，久違嘅出街打邊爐，揀咗呢間裝修設計可以打卡嘅餐廳。餐廳內外
設計都幾有特色，符合返冰室主題，有好多懷舊嘢，顏色以綠色為主，就有啲好似學校嘅感覺，都坐得好舒服。
食物選擇
唔止火鍋，仲有雞煲可以食，不過今日我哋就食火鍋，而佢亦有普通茶餐廳嘅食物。
鹽香脆炸魷魚鬚 $48
未打邊爐之前嗌左款小食， $48好抵食，炸粉好薄，魷魚鬚亦都唔會呃秤，做餐前小食啱晒。
胡椒豬肚鮮雞鍋 $138 (半隻)
眾多款湯底就揀咗呢款胡椒豬肚鮮雞鍋，唔好以為半隻好少，食到最尾啲雞都仲未食完咁，湯底好濃郁，店員告知原來熬足8小時以上，唔怪得咁濃味啦！胡椒味突出，豬肚亦都好多件，唔會有內臟嘅腥臭味，呢款鍋底夠晒滋補。
極品安格斯牛頸脊 $198 (小)
打邊爐又點少得叫牛肉呢？因為想食多啲款式，就冇叫拼盤，而嗌左呢款牛頸脊，睇色水就知道係靚料，色澤紅潤光澤，每一件分布均勻，咬落有嚼勁冇渣。
手打流心鹹蛋豬肉丸 $28(四粒)
比較少見嘅款式，入面釀左鹹蛋，配豬肉丸有幾夾啵。
芝士手打牛肉丸 $28(四粒)
要留意煮嘅時間，否則煮耐左入邊嘅芝士就會熟得滯，時間啱啱好嘅話就可以做到流心嘅狀態，不過呢款牛肉丸嘅牛味就唔算好突出。
皇帝菜 $16(半份)
如果係辣湯底我就未必會嗌菜，因為唔想食油，但係滋補嘅湯底當然要嗌返款菜式下啦，啲菜都好新鮮。
讚岐烏冬 $20
埋尾唔少得嗌返個粉面，烏冬索到啲滋補湯底，配埋牛肉食，好滿足呀！
總括而言，因為本身個鍋底已經有好多料，所以食完都飽咗一半，餸菜就唔係嗌特別多。下次想帶埋屋企人嚟，主要原因係價錢真係唔貴，食物質素高，餐廳環境又好坐得舒服，好啱一家大細嚟。
