陳根記

营业中

休息中

陳根記搬去沙田石門後一直都想再試，但每一日都咁多人，真係好難的起心肝用粒幾鐘等位。疫情下，好多餐廳都少咗堂食客，所以決定趁「人少少」嘅時候幫襯返一次。放工後以最快嘅速度趕到餐廳攞位。到達陳根記時大約6:35，可以自行入座，但目測已七成滿。然後喺不足10分鐘內，餘下嘅三成枱亦已經坐滿。餐廳裝修刻意營造以前大排檔喺禾輋邨嘅感覺，但始終係有分別，營造不來。我哋叫咗招牌蠔餅、孜然棒棒骨、椒鹽白鱔片及白菜仔炒雞柳。嗰期仲要係每叫一個餸就送一罐汽水或者啤酒，去大排檔食就啱晒。感覺係每碟餸無乜點加價，但份量就少咗啲。餸整體都係好味，但就好似比以前少咗氣，我個人覺得仲係唔錯。而且出餸好快，餸又夠熱。可能舖個比以前大排檔時細，再加上客人都幾多，所以繁忙時間限時80分鐘，如果同朋友傾計係唔夠喉嘅，要留意下。不過其實我又唔覺得好嚴格執行，因為我哋食咗個半鐘又唔係太趕我哋。