陳根記

营业中

休息中

提到大排檔，一定會諗到「陳根記」，但自從禾輋排檔遷拆，「陳根記」搬到石門後，一直無機會黎，今日趁住做冬一於再黎食下。餐廳入舖後， 環境更爲乾淨舒適，但舖內人氣依舊。主餐牌依然不變，但加入更多新菜式，可以有更多選擇，一家四口叫左四個餸。Wasabi蟹子手撕雞 :陳根記招牌菜之一，點可以唔叫？雞肉爽口嫩滑，wasabi微辣下越食越嗆鼻，但味道唔會太重，唔太好wasabi嘅我都食到停唔到口，配埋蟹子、海蜇及青瓜，半隻雞話咁快就食晒。川味腩肉豆腐煲 :一向喜歡食豆腐煲嘅我地，見到呢款新菜式，梗係要試下。豆腐煲相當足料，除左豆腐同腩肉外，仲有大量辣椒，入口味道辣辣地相當開胃，腩肉切得夠薄身，入口爽口而唔太油膩，整體感覺有驚喜。粟米斑塊 :食小菜必點項目之一，斑塊炸得外脆內軟，面頭炸漿唔太厚，配埋微甜嘅粟米汁，用黎撈飯簡直係一流。XO醬炒翠玉瓜 :蔬菜我地揀左翠玉瓜，份量相當多，翠玉瓜經炒過後仍保持鮮嫩，微辣嘅XO醬唔會蓋過翠玉瓜味道，反而感覺更惹味。