今日得閒步行去 , 諗住如果再食唔到 , 我就去附近茶餐廳食就算。點知行到去就見到大招牌 ,
鋪面落地玻璃加趟門 , 望入去好通透 , 見到有兩位食客 , 我就推門入內坐低。當時只見水吧內
有一見皮膚較黑女子 , 向我點頭及說【請坐】, ok 百忙中亦冇欠禮貌。
店內環境好整齊好乾淨 , 醬料盛載器皿洗抹得好乾淨 , 抵讚!
後來有一位戴眼鏡男子行近 , 我寫左三個菜【大腸+牛腩+蘿蔔+油麵(少辣)HK$20+凍奶茶HK$7】, 佢問我係食下午茶餐HK$20包飲品果個餐 , 定係散叫? 我問佢有咩分別? 佢答我話【大碗份量多o的囉】, 我晏晝飯都未食 , 咁就叫散餐啦!
先到【凍奶茶】,望落幾大杯 , 但我一眼睇得出淡奶絕對唔夠 , 因為望落似一杯凍咖啡顏色。飲落茶味極淡口 , 奶味太少更加淡口啦! 杯凍奶茶仲差過西餐廳扒房呀 , 我當好過飲凍水啦 , 話哂碗車仔麵都有辣汁嘛! 點都要杯凍飲解下辣o既。
之後好快車仔麵上枱 , 少辣辣汁好細心另外用醬碟上 , 碗麵都好大碗。
先講【大腸】, 可能之前俾卥水浸過 , 顏色好深而且過淋唔夠爽口彈牙 , 味道又係好淡 , 麻麻喎!
再講【牛腩】, 如下面另外食評家講 , 好細粒冇口感 , 味道都唔覺惹味 , 冇o左平時食開花椒八角濃味 , 要改善。
後講【蘿蔔】, 有三大舊 , 其中兩舊太淋有渣 , 只有一舊好爽口冇渣 , 可能蘿蔔老左少少 , 同埋煲得太耐太淋啦 , 要注意!
【油麵】正常冇咩特別 , 算係好食。因為市面上有o的油麵質素較差 , 又扁又乾身 , 不過好在唔係。
服務方面非常好 , 一坐低有清茶一杯 , 戴眼鏡男子應該係老闆之一 , 好客氣好有禮貌。
個人覺得需要改善係 , 每枱預備多一筒廁紙就好啦 , 而且凍奶茶茶膽要再翻浸多幾次 , 淡奶六要俾多少少唔好慳 , 杯茶對我o黎講好重要 , 係我一日之中o既動力 , 哈!
埋單HK$27 元 可接受唔貴 , 同埋真係夠飽o岩o岩好。店內仲有好多各式各樣食物選擇 , 其中老闆話有【豬腳薑】, 我記得好似大約HK$25 左右 , 大家不妨試試。
下次我會再幫襯 , 希望繼續改善 , 最緊要保持殷勤服務態度及鋪面衛生~
