香港浸信會神學院食堂 (已結業)

今晚有朋自遠方來，由港島區嚟到新界區當然要帶佢食啲好少少嘅嘢啦，呢間餐廳係我覺得值得推薦比朋友的。今次又嚟到呢間要自助式開枱、執枱嘅餐廳，我地人少少，但都叫了4餸1炒米，3個人埋單$355，都算係咁啦，碟碟都夠晒份量，飽到食唔晒。 薑蔥霸王雞，第一次喺度食霸王雞原來咁好食喎，點解啲雞肉可以咁淋咁滑架，好好食呀，簡簡單單配有薑蔥嘅香味已經好足夠。士多啤梨骨又係我愛食之一嘅菜式，酸酸甜甜嘅士多啤梨醬好開胃，配煎至剛剛好嘅金黃色腩排甘香可口，小朋友應該都喜歡食。椒鹽鮮魷，呢度嘅椒鹽菜式亦都做得好出色，炸得金黃香脆，鮮魷彈牙而不過火。瑤柱海味粉絲雜菜煲，捨得用蝦干而唔用蝦米，亦都有健康嘅木耳和腐竹，呢個雜菜煲又係無得輸啦。今次唯一令我失望嘅星州炒米，雖然比之前大碟，賣相都好吸引，但味道好淡無咖哩味，個服務員聽到我地話無味後，佢即刻幫我地攞入去再炒過，但都係去唔返之前嘅水準。