炊公館 (已結業)

今日同幾個同事齊齊準時5點收工，大家都唔想咁早返屋企，想搵個地方食下野傾下計，於是就揀左呢度飲酒食好野，最開心係有得坐outdoor位，望住個咁開揚既景觀，居高臨下，心情真係即刻爽晒，令大家傾得食得同飲得更開懷~呢種氣氛下最適合歎新鮮海鮮，order左個Seafood platter($888)4個人開心share，有生蠔、扇貝、波士頓龍蝦、海蝦同蜆，份量十足，賣相吸引，一上枱梗係要相機食先啦！生蠔好肥美、蠔味濃，口感creamy，一食就知係來貨靚；扇貝超級大粒又爽脆，味道鮮甜；波士頓龍蝦都幾大隻，肉質嫩滑細緻；海蝦味道鮮咬落脆；蜆鮮甜得黎最重要唔會有沙。大家一邊食一邊飲酒，真係好relax~之後再黎一客Cheeses board($ 240)，有3、4款芝士再配麵包或餅干食，小女子見識唔多，咁樣食芝士真係第一次，原來芝士既味道可以咁多元化同咁多層次，同紅酒特別夾，出乎意料竟然唔膩~4個人，每人$350，食得滿足、傾得盡情，望住個靚景3粒鐘，成個人叉返足晒電！