本身係朝住呢間個焗芝士流心蛋大啡菇而遠赴西營盤，點知太好賣sold out！不過好彩其他嘢食都唔差，可以彌補返失落嘅心情！
首先嗌咗份medium嘅和牛西冷，慢煮嘅牛肉唔會過熟，同時肉質保持鮮嫩，外表再輕輕煎下加上鹽同胡椒調味已經好好味。
而雞翼真係超級香脆好出色，上面淋有咸蛋黃醬 ，微微辣感好快就清哂一盤！
而焗菠菜苗好有驚喜，菠菜爽口唔會太淋，無論係蝦啦、芝士定忌廉都比好多，個人非常想拎啲汁去煮意粉！
食完咁多嘢就算飽都要食返個甜品，佢個Tiramisu 好香滑，滿滿都係香濃咖啡粉，加埋baileys好夾，酒精嘅味道可以將蛋糕嘅甜膩中和，非常唔錯！
雖然呢間個位置比較偏遠好多人都會忽略，但佢啲嘢食都實在不錯，個人覺得有去開西上環都可以一戰！
適獨指數：🌚🌚🌚🌚🌚
好味指數：🌝🌝🌝🌝🌚
抵食指數：🌝🌝🌝🌝🌚
.
