木玥巷 (已結業)

今日約埋朋友去做facial，所以一齊食埋晏先，經過呢頭附近見到呢間台灣野都好多人食，排晒隊咁，以我嘅邏輯就係多人食應該都唔差。所以我哋有埋湊下熱鬧，佢哋嘅選擇唔係太多，但就樣樣都有啲。我自己就叫咗個鹽酥雞飯，你個餐會跟一個蒜蓉秀珍菇，不過就凍食嘅。而佢啲鹽酥雞我就覺得乾咗少少，不過炸得幾鬆脆。朋友就叫咗個蟹肉炒新竹米粉，佢個米粉都炒得比較乾身，見佢蟹肉嘅份量都唔少，見佢成碟都食得乾乾淨淨，都唔使點樣形容啦。另外我哋叫咗個澎湖花枝蝦排。大家異口同聲都話未食過咩係蝦排，嚟到先知原來其實係炸蝦餅。佢個炸蝦餅真係幾好食，入邊真係有蝦同花枝肉，而且真係好彈牙。朋友叫咗杯玫瑰可可鮮奶，見到佢杯嘢其實有啲想搶咗佢杯嘢嚟飲，因為我見佢個賣相真係好靚好吸引。而我自己就叫咗杯西柚百香果，完全冇諗過原來會咁大杯，仲好足料添，味道亦都偏向西柚味濃啲，不過都幾解膩。