九重町日本料理 (已結業)

朋友話想食日本野，佢話佢同事介紹過一間有質素既日本餐廳，但價錢係合理，唔會成千銀一個，咁就一於陪佢試試。位置的確相當隱蔽，唔係佢同事介紹根本唔會摸入黎，因為係屋苑樓下既餐廳。地方環境都算舒服，先黎軟殼蟹牛油果卷，大大舊牛油果係壽司飯上面，加上蟹子令口感夠滑之外咬落層次豐富，而裡面既軟殼蟹就軟中帶鮮甜味，令人好開胃，係最適合既前菜。跟住係一系列既魚生刺身壽司，食得出用料係新鮮既，例如左口魚裙邊，食落帶少量魚油，質感勁滑而略帶鮮味，另外火炙松葉蟹柳食落非常鮮甜，火炙後口感就更佳，章紅魚就非常鮮甜肥美，魚鮮味原汁原味，至於壽司飯細細舊，岩晒女士既口型。鹽燒牛舌又係另一種好美味既燒物，因為牛舌本身薄薄地又夠新鮮，所以肉汁豐富，無需多餘既調味，簡單地用鹽黎燒，就可以帶出牛舌獨特既鮮味。另一樣燒物係燒雞翼，都係簡單地鹽燒，食落就知道，本身新鮮既材料真係用簡單既方法就夠好味，雞肉夠實而滑之外，雞肉汁充滿係雞肉裡面，好味。