上到去只有幾台客，唔駛等位，幾好~~
呢間CAFE係食台灣野，有得就咁叫個食送食、亦有飯、麵同沙律等選擇，價錢大多係$6X。
睇報紙話叫”火鳳燎園”既雞係招牌菜，餐牌寫只係$68，就嗌左呢個加埋個牛肉麵($68)。點知點菜時侍應話餐牌印錯左，”火鳳燎園”係$88唔係$68，而$88已經係新開張既優惠價，遲d會變返$108…
但因為想試招牌菜，都係照叫。
野飲方面，因為我地見餐牌冇寫有得加錢叫野飲，就問下個侍應。原來晚市冇套餐，飲品要散嗌，睇menu成廿幾三十蚊一杯…咁侍應就推介我地嗌個甜品餐：台式厚多士+2杯野飲($68)。因為散嗌兩杯野飲都同甜品餐個價差幾蚊，但就多個厚多士，計落有so，咁我地就嗌埋個甜品餐喇。
等左一陣，侍應過來話”火鳳燎園”今日冇得供應，正想黑面之際，侍應話會免費送個”食送”比我地。咁正？！唔駛多講，即睇餐牌，嗯~~就要蚵仔煎啦~~
又過左一陣，牛肉麵來喇~~待應主動問我地駛唔駛要碗仔，咁梗係好啦~~分完麵，我急不及待食一啖牛肉，嘩~~又淋又入味，正呀！
再試個麵同湯底，正正常常啦，冇咩驚喜。
之後等左好耐先上蚵仔煎，男友想送飯，就嗌左碗白飯兩份分
。蚵仔煎岩岩煎好，唔會太多油，味道ok唔會太咸（男友話唔太夠味所以有點到一隻好咸既汁，我就覺得夠味所以冇點汁），蠔仔亦都有好多粒，幾肥美~~呢碟蚵仔煎送飯一流，好快就比我地兩個清哂。
最後就到甜品喇，我地點既係奇脆蜜糖多士配芒果，有兩球芒果雪糕（一球係多士上面，一球另上），唔駛爭。個多士賣相唔錯，食落唔知點呢？先食一粒麵包粒，烘到脆脆地又滲哂d蜜糖，好味！
再試球芒果雪糕，質感似係雪葩多d，但味道太甜喇，唔係咁鐘意~~早知聽男友講要朱古力啦~~最後試埋裝住麵包粒既外皮，好乾，冇乜烘過咁又冇乜蜜糖味，no good~~
都係麵包粒最好~~
