太興 (已搬遷) 新店位置

透過銀行信用卡推廣活動，換咗份太興嘅免費早餐，平日多數晌屋企食，今朝就早啲出門，去太興啦！免費早餐券係可以換乜嘢早餐都得，認真唔錯，無乜諸多限制。爽爽手就睇中佢個人氣早餐N3，係乜，就係火腿通粉拼德國香草腸，配鬆脆多士，加咖啡或茶。火腿通粉 – 可能太早，客唔多，通粉有啲整定咗一段時間未去貨，所以有啲腍，火腿、湯底都係普普通通咁啦。德國香草腸 - 唔似係普通貨色，無一般茶記啲腸太鹹嘅通病，隱約有朕香草味，肉質又唔會太削太霉，幾好喎。如果煎得帶少少燶面，腸衣相信仲香仲脆。鬆脆多士 - 一整塊厚多士，烘得軟熟、鬆脆，但又出現茶記另一個通病，點解係都要俾舊未解好凍嘅牛油，「硬挖挖」叫人點搽，結果咪搽到塊多士面「熔熔爛爛」囉！熱奶茶，夠熱夠香，但唔算太滑，希望將來做得更好啦。