Catio (已結業)

原來sogo附近就有間貓貓cafe，一直都唔知，都係無意中喺ig見到，就同朋友嚟一齊過節慶祝下🥰Catio環境好好、好靜，可以靜靜地陪啲貓貓玩同埋傾吓計都好開心，整體個環境都好舒服，適合同朋友逗留長時間～今次帶咗個炸魚薯條（$168）、鮮茄免治豬肉意粉（$138）、桂花烏龍同埋玫瑰朱古力，不過因為嗰日咁啱薯條賣晒，所以轉咗薯格。佢啲薯格辣辣地都幾正，佢仲有泰式辣醬同埋茄汁俾你揀嚟點😋至於個意粉係返茄汁，所以好開胃，如果個份量再多返少少就好！嘢飲方面，個玫瑰朱古力最有驚喜。我本身就好鍾意飲朱古力，冇諗過佢同玫瑰嘅味咁夾，令到本身個口感再多咗層次，而且嗅覺方面都得到滿足🥰一邊聞住啲玫瑰香飲真係好正！仲有佢個杯真係超可愛！