Kam's Cafe (已結業)

係太古做野咁耐，都未試過幫襯呢間咁精緻的cafe, 所謂精緻, 就係佢店內的裝潢好有英式咖啡室的格調,淡藍白背景, 裝飾夠簡潔,所用的咖啡杯亦好有英倫風味。 黎食晏可以為繁忙的都市人生增添幾分悠閒的感覺。今次都係同事帶我黎, 我地兩個係門口排隊,大約等左10分鐘就有位,呢度有午餐同散叫, 午餐選擇唔多,不過份量都幾足,有咖啡又有甜品,索價$90元,以太古城裏的餐廳黎講, 呢個收費好合理。 我叫左個日式雞扒(日式燒汁)配薯菜的午餐, 雞扒都好厚身,雞皮脆卜卜, 雞肉夠嫩滑,唔錯唔錯。 仲配埋肥嘟嘟薯條同薯仔沙律,份量都於女士黎講較多,但有衣食的我全部食晒! 餐飲梗係要試下杯咖啡啦~可惜我因為要趕番寫字樓,無細味杯咖啡,所以唔評論了。 至於甜品,我揀左雪榚, 雪糕口味有多款選擇, 除左雲呢拿,仲有士多啤利,黑芝麻,朱古力同綠茶。身為綠茶控,我毫不猶豫就揀綠茶味啦,佢呢隻綠茶味偏甜,奶味重,對於鐘情偏澀綠茶味的我,呢隻唔啱我口味,不過作為跟餐甜品,有咁多口味選擇,呢間餐廳都好有誠意,抵讚。 同事話呢到的甜品下午茶都唔錯又抵,等我假日黎試下先!