亞玉豆腐花

营业中

休息中

雖然幾乎日日都返紅磡，但我甚少到訪這條為人熟悉的小食街，但每次經過這間糖水小店，都見有街坊幫襯，今日下午茶時段又再經過，終於決定買幾款同屋企人分享。雖然款式不及連鎖甜品舖多，但款款都係傳統港式味道，其實諗清楚，這些港式糖水的做法和用料往往比新式糖水健康得多，選用多啲天然材料，營養價值相對高啲。細個最鍾意食紅豆砵仔糕，見到呢度嘅砵仔糕有咁多紅豆，真係流晒口水。$12/5個，價錢平，但份量相對少，好處係每次食少少，又或者方便同企人分享。啖啖都係紅豆，好有好感，不過略嫌整個砵仔糕嘅粉漿糖分不足，冇咩黃糖嘅香味，食落比較清淡。✨✨推薦黑豆豆腐花！勁香濃豆味！口感幼滑！見老闆娘加好多紅豆落去，+$3抵食呀，味道比單食豆腐花或加黃糖更豐富。呢張相證明一切，芝麻糊打得超杰身，真材實料，有非常之突出嘅芝麻味。呢個新產品就一般般啦，講真加咗薏米同白果都冇咩特別味道，加上黃豆豆腐花嘅豆味不及黑豆香濃，整體味道單調。