點點甜 (已結業)

好耐前剛剛開店完全無咩人唔洗排，第一次食完個豆花就愛上，料夠味好，之後差不多一兩星期去一次。到上個月開始連平日都大把人排隊，打左幾次退堂鼓。可能昨晚天氣熱到暈，企唔到條街咁耐，見只需等幾位，咁就等左大約十分鐘。例叫豆花，一來到見到已經知以後唔洗再叫，汁多到見唔到豆花，以前豆花係成大塊自己整碎，而家變左勁小豆花又勁碎，碗野完全無味，因為紅豆得幾粒，以前係一大匙紅豆，食個紅豆味。個雪榚係Mango味完全無Mango味，連溶晒都食唔到D水有味，食到要拎朋友既料來吊味，唔係真係食唔落，唔知以為飲緊奶。真係好失望，仲以為搵到間正野，可以收工去食下，點知一多人就完全保持唔到水平，旺角既野就係咁，為錢錢錢錢，一多人幫襯就是是但但偷工減料。環境就係好迫，唔會坐得好舒服，食完就要即走，唔洗諗有得坐一坐，裝潢就仿台灣用木，睇落好大自然。