兩個人去，坐低就例牌QR CODE落單，搞一大輪，居然send唔到出去，唯有叫侍應幫手，佢話可能個系統出問題。咁算啦，佢都幫我地落。
我地點咗個半筋半肉牛肉麵同香麻豬手肉燥飯，各加廿八蚊變餐有嘢飲同甜品。
精彩喇，碗麵唔講佢，普普通通咁，但我個豬手飯，嚟到得三小舊，嚴重發育唔健全咁！仲有個所謂跟餐甜品雪糕，居然係牛奶公司細杯裝！
嘩！我頂佢個掣，駛唔駛食水咁深啊？我唔係食唔起貴嘢，但啲嘢同你個餐牌令食客嘅期望，出入好大囉！
總之一句，食完成個餐連嗰杯雪糕係唔飽嘅，夠膽死一個咁嘅餐收104。頂！仲要加一！
自己落單要收加一，系統唔得浪費時間，未食完又想執走人地啲嘢！個場人又唔夠，叫人叫極都無，服務費俾咗，有咩服務啊？如果齋傳菜、埋單要收服務費，咁駛唔駛我自己入廚房煮埋啊？俾啲咁嘅嘢同服務俾客，超伏！
