豚道樂 (大河道) (已結業)

晌荃湾大河道几出名嘅豚道乐，虽然开咗一段日子，但系呢次系我第一次嚟试。佢入面有几张高身吧台，另外仲有一张比较大嘅长方形木台。同一般嘅日式拉面唔太一样，呢度系走工业风路线，天花板仲挂咗好多个好似风扇咁嘅灯饰，都几得意。同埋摆咗好多个日本达摩，每个嘅造型都有少少唔同。佢哋有几款汤底拣，仲有平日、周末同季节限定款式，另有特上同经济之分，前者嘅配料会比后者多。先叫咗两支饮品，招财猫汽水个樽上面嘅图案几可爱，味道就有啲似波子汽水，甜味唔算太重。山梨桃梳打就即系有气桃味汽水，都唔错。灸烧芝士豚肉，豚肉上面铺满烧到半溶嘅芝士，下层就有块紫菜，食落香口。日式饺子，饺子底煎得香脆，饺子皮就烟烟韧韧，中间肉馅多汁。不过就等得比较耐少少，我哋差唔多食完拉面先拎到嚟。特上日本芥末拉面，分别有猪肩肉、猪腩肉、溏心蛋半只、紫菜、芽菜、木耳、葱花等等，配料几丰富。第一次食呢种加咗日本芥末嘅猪骨汤底，汤呈淡青色，卖相都算讨好。先饮一啖汤，感觉黏黏地，同埋有少少辛口，有趣得嚟又唔太过火，入面仲有芝士碎，捞埋一齐食几惹味。面条方面就拣咗曲面，质感都几烟韧弹牙。猪肩肉薄切爽口，食落唔错。猪腩肉比较厚切，口感都几松化有油香。