食左減肥餐3個星期，終於可以放縱一日，食番正常野，點知中哂伏!!! 😤嘥左我個咁難得嘅放縱機會😞
一行四人，點左五樣野，本身仲諗住叫多個炒飯，好彩當時打算食到一半睇有幾飽再決定，如果唔係，又要夾硬食多一碟難食嘅野落肚😖。
第一碟上枱----
椒鹽鮮魷 $86
呢個價錢嚟講，份量幾多😃，本身仲諗住好抵食，點知原來份量多先難頂…😅首先呢碟野溫度只係暖，唔係即炸出嚟；第二根本就唔係鮮魷，口感同味道都似水魷，得個爽字，完全無魷魚味!!!😢
第三好厚粉；第四炸蒜係淋喺面，無一齊炒過，所以無椒鹽、無蒜香、一定要點個淮鹽，因為成舊野都無味!!😤 呢個係我食過最難食嘅椒鹽鮮魷!!
第二碟------
黃金桂花蝦球 $108
呢碟係人氣推介，在場有唔少人食緊，所以溫度係辣口嘅程度!!
份量好多，有十幾粒大大嘅蝦球，而且賣相幾靚，又有少少桂花瓣，感覺有番D希望。😏
食完之後，真係要讚下呢度嘅廚師😲點解十幾粒咁大嘅蝦仁，可以拿到得個爽字，完全無蝦味?? 就連鹽嘅調味都無，果下先犀利😒 完完全全係食緊一舊鹹蛋黃味嘅爽口炸物，油膩感極高，油到反胃。🤢
第三碟-----
英式芥末牛柳粒 $118
呢個又係人氣推介，經歷左前兩度菜，已經無任何期望😓
牛柳當然已經拿到完全無牛味，同埋好淋嘅口感啦，細嘗之下仲會食到少少鬆肉粉嘅味道添，建議大家點多D芥末醬嚟食，咁就可以蓋過怪味，同時亦要飲番多D水，因為真係好多味精😩。
第四碟------
深海墨汁海鮮麵 $98
又係一度賣相吸引嘅食物，配料有海鮮味嘅帶子3粒、好難食嘅爽大蝦仁4隻、得個爽字嘅無味魷魚；麵係偏硬嘅扁意粉；墨汁唔腥，有落鹽調味，所以個麵食落比蝦同魷魚好。
冰鎮咕嚕肉 $88
又又又係人氣推介，呢個餸係全晚最正常，份量亦係最少，肉得十幾粒，唔明點解巴西豬肉可以賣咁貴🤔。
當晚全場爆滿，更有外藉人士進膳，門外不時有客人等位；食物賣相吸引、選擇多；上菜快，職員又勤力；餐廳環境光猛、企理；一切硬件都唔差，可惜，食物真係強差人意，真係好難食😫😫，我地幾個番到屋企都不停飲水、話口渴。六個字評價呢間小店，「不可一，不可再」。
晚市收茶$5/位，無加一，接受電子付款。
