大快活 (已結業)

喺西環行得餓餓哋，想食tea，結果就走入呢間大快活。望下menu，淨係想簡簡單單食個西多士啫。配嘅細低糖凍綠茶係免費嘅，不過好似我咁識飲，一定豪一蚊雞畀佢加大做大綠茶啦！最欣賞大快活嘅西多士就係佢夠新鮮，雖然係要等一陣先有得食（今日無乜人幫襯都要等五分鐘），不過見到炸到金金黃黃嘅西多士，就無乜所謂啦  試過一啲快餐西多士，炸到由乾由硬，重要一刀切落去擠晒啲油出嚟，見到都唔開胃！但係呢份西多士就完全無呢堆問題嘞，外脆內軟，加埋啲煉奶，正！不過如果鍾意花生醬嘅人就會失望喇，因為呢份西多士係無花生醬嘅，不過既然在下唔係咁鍾意花生醬，對我就當然係零問題！