行到呢度，唔知點解好想入去，門面又唔係好吸引呀，真係唔知為乜！是但啦！入到去，地方唔係大，我諗得十多張枱左右啦！我行到最入，張張都坐咗人，其實我唔介意搭枱嘅！呢個時候老闆見到我問我幾多個人，我話一個人，佢叫我坐埋佢度，其實佢寫緊嘢，嗰時成枱都係嘢，佢都執好啲嘢，我真係唔好意思！到我落單，佢見樓面冇人仲親身幫我落埋單，我十級唔好意思！老闆好nice囉！
今日我叫咗雞翼薯條，加杯熱華田！雞翼炸得啲皮勁脆，而且唔乾身添，我覺得好食過某連鎖店嘅雞翼嘅！
(個人感覺) 薯條仲要係我最鐘意嘅波浪薯條，又係炸都脆口，真係食到唔想停口！
杯華田甜度剛剛好，唔使落糖！(有啲地方一係過甜要加水，一係冇乜味仲要落糖。。。) 成個餐都係$32咋，抵！
PS。其實我見到佢個常餐個配搭都好特別，可惜我唔肚餓。。。下次有機會再食！
