壹碗壹碟 (已結業)

筲箕灣東大街曾經係香港有名嘅食街，不過自從疫情肆虐後，成條街就冷清咗好多，嗰日嚟到壹碗壹碟，雖然唔使等位，好彩間舖都有七成滿，依然有班手足落力支持，唔錯，唔錯😃。雖然係街坊小店，但呢度好高科技，要用 QR code 落單，咁啱我哋三個都係懶人，於是就揀咗 menu 上面唯一三款現成嘅麵：椒積雞扒麵，椒積豬扒麵同八香牛展麵，另外再加一碟避風塘豆腐。除咗麵底同湯底之外，仲可以揀多蔥走蔥多蒜走蒜少油走油加醋加辣粉等等等等，非常認真，有一刻我以為自己幫襯緊日本拉麵店😆👍。三碗麵當中以牛展麵最好食，牛展既腍又入味，豬扒同雞扒則煎得比較乾身，有少少硬，不過味道都唔錯，三十八蚊大大碗餸多多，性價比其實算好高。值得一提係呢度嘅蒜蓉好好味，撈埋落碗麵度食非常惹味，所以一定記住要揀多蒜。至於個避風塘豆腐又係份量超多，亦好香口，如果避風塘味再濃啲就更加正。小店雖然地方淺窄，但係四周圍都有海量嘅文宣，一路食，一路睇，絕對係一種享受😌。