魔膳廚房 (已結業)

不經不覺同衰佬已經相識九個年頭了，好感激有佢呢個人肯陪我四周圍飲飲食食，所以一有身邊朋友推薦有好既餐廳，我就會好想同佢一齊去試吓。咁啱我有個舊同事之前有介紹過我去試一試魔膳廚房。魔膳廚房位置喺官塘APM附近，搵路一啲都唔難，APM近觀塘廣場出口扶手電梯直落轉右，唔使一分鐘就見到招牌，樓梯上一層就到呢。這裡環境都幾舒服，餐桌與餐桌間有合理既空間，唔會感覺同迫住迫住咁，又唔洗吓吓比旁邊客人聽到你講嘢。中間有個沙律吧，只要加38元就可以享用。 我哋分別點咗一個主菜，德國烤原隻豬手配薯角和自家製海膽汁海鮮意大利粉。餐湯分別係叫左羅宋湯及黑松露磨菇湯，羅宋湯一般水平，但磨菇湯幾香黑松露及忌廉香味，佢仲會用忌廉寫上餐廳名ＭＳ兩字！德國烤原隻豬手配薯角跟黑椒汁豬手皮烤得好香脆，唔太肥膩，肉質唔乾身保持到有肉汁，宜家睇見都流口水。自家製海膽汁海鮮意大利粉整碟意粉都係橙黃色的，證明有很多海膽汁，個汁好鮮甜，意扮爽口彈牙，配鮮蝦、青口、魷魚等海鮮，整碟感覺鮮上加鮮，好味道!整體而言，我覺得食物水平以呢個價錢係講係抵食，值得推介！