小田拉麵

駱駝漆呢間拉麵店充滿日式動漫風 擺咗好多動漫poster同figure 啱哂動漫迷過嚟朝聖 餐廳仲好貼心放咗一盒橡筋係枱面 方便食野個陣扎起d頭髮


櫻花蝦淡麗貝汁湯拉麵
貝汁湯底好清甜 飲到好純粹嘅蜆貝鮮味 一d都唔油膩 面頭鋪滿咗櫻花蝦同蜆貝碎 增加咗唔少口感 慢煮叉燒超級大塊 肉質軟淋 溏心蛋流心效果一流 另外加咗粟米芯 爽甜多汁


蟹之雞白湯拉麵
雞白湯本身已經夠濃郁 再加埋蟹嘅鮮味落去 飲落好厚身好creamy嘅感覺 將蟹膏同蟹肉撈勻晒落湯度個鮮味再提升多個層次 朋友額外加咗替玉同2塊叉燒 食完飽到上心口


炸雞皮餃子 (4隻)
即叫即炸 外皮微脆 入面餡料充滿肉汁


飲品方面叫咗日本樽装波子汽水同日本提子梳打 夠哂清爽