在家居酒屋 (已結業)

在家係我既觀塘愛店之一，旋風滑蛋飯係世界級的正，刺身丼又鮮甜，佢既健康沙律餐飽肚又好味，我個個星期都至少食一次🥰 在家係大圍既新店進化成居酒屋，多左好多野食🤗 除左必點既旋風滑蛋鰻魚丼，今次仲試左壽司同埋串燒🤗

香蔥吞拿魚腩碎海膽卷 ($88)
卷物上舖滿海膽同呑拿魚蓉，呑拿魚蓉感覺用上近魚腩既位置，打成蓉亦甘香肥美，而海膽都好鮮甜。底部既蟹柳卷都唔馬虎，包住粗身蟹棒啖啖肉，足料抵食！


七味豚肉串($28)
調味恰到好處，肉質爽彈好喜歡！


自家製月見免治雞肉棒 ($38)
免治雞肉棒混入左雞軟骨碎有咬口，沾上溫泉蛋汁一齊食好滋味！

旋風滑蛋鰻魚丼（$98）
超掛住呢個滑蛋飯，真心係我喺香港食過最好味既日式滑蛋飯🥰 大大座旋風形蛋塔賣相一流，半熟滑蛋非常滑溜，蛋香濃郁🤤 飯入面藏有多片鰻魚，肥美而且蒲燒得非常入味，連埋沾滿蛋汁既珍珠米一齊食超惹味！